Kex hostel við Skúlagötu 28 er einn heitasti staður miðborgarinnar um þessar mundir. Þar fer saman skemmtilegt umhverfi , góður matur og smekkvísi í vali á tónlist. Sérhvern þriðjudag er boðið upp á fyrsta flokks jazztónlist, íslenskra og erlendra jazzista. Hljómburður er góður í húsinu og aðsókn mikil. Það er knattspyrnukappinn Pétur Marteinsson sem leiðir hóp eigenda og stjórnenda sem bersýnilega vita hvert þeir stefna og hvernig þeir ætla að komast þangað!

Laugardaginn 5.maí er langur laugardagur og verður margt á döfinnni. Dag harmonikkunnar ber upp á þennan dag og verða fjölmargir harmonikkuleikarar á ferðinni að skemmta gestum og gangandi í miðborginni. leikur þeirra hefst á nokkrum stöðum kl. 13:00 og síðan verða sameiginlegir stórtónleikar á Ingólfstorgi kl. 15:00. Allir verlkomnir.

Nú liggja fyrir niðurstöður viðhorfskönnunar Félagsvísindastofnunar fyrir Miðborgina okkar um ýmis mál er varða rekstraraðila og almenning í miðborginni. Hægt er að skoða niðurstöðurnar í pdf viðhengi. 

Viðhorfskönnun meðal aðila sem stunda rekstur í miðborginni Apríl 2012

Aðalfundur Miðborgarinnar okkar verður haldinn að Kex Hostel föstudaginn 27.apríl 2012 kl. 18:10. Að loknum hefðbundnum aðalfundarstörfum verður boðið upp á léttar veitingar og lifandi tónlist.

Barnamenningarhátíð verður haldin í Reykjavík dagana 17.-22. apríl 2012. Þema hátíðarinnar er Uppspretta og endurspeglast það með ólíkum hætti í tæplega 200 viðburðum sem börn og fullorðnir, í fylgd með börnum, geta sótt sér að kostnaðarlausu!

Dagskrá fyrir Barnamenningarhátíð er fáanleg fyrir Iphone og Android tæki í gegnum hugbúnað sem hlaða má niður ókeypis í gegnum viðkomandi netverslun. Smellið á "Dagskrá fyrir" og hlaðið niður viðbótina (Happening) sem birtist til vinstri á nýrri vefsíðu.
Nánari uppl´+ysingar er að finna á Facebook og slóðinni barnamenningarhatid.is

Einn dapurlegasti ljóður á samfélagi okkar er það ofbeldi sem brýst reglulega út á galeiðu næturlífsins í Reykjavík. Fólskulegar árásir illmenna á blásaklaust fólk sem í sumum tilfellum nær sér aldrei að fullu, er með öllu óviðunandi og löngu tímabært að skera upp herör gegn. Í langflestum tilfella af þessu tagi eru örvandi efni hvatinn að ofbeldinu, oft í bland við áfengi. Þeir sem verða örvita af neyslu örvandi efna geta orðið svo ógnvænlegir og hættulegir að jafnvel harðsvíraðir lögreglumenn og þjálfaðir öryggisverðir hugsa sig svisvar um áður en þeir treysta sér í átök við slíkt lið. Slíkt vekur óneitanlega upp spurningar um hvort tímabært sé að lögreglumenn hefji beitingu óhefðbundninna aðferða við að hemja og ráða niðurlögum rusta á borð við þá sem vikulega ganga í skrokk á blásaklausu fólki í miðri Reykjavíkurborg. Ljóst er að þolinmæðin og umburðarlyndið sem þessu liði hefur verið sýnt á undanförnum árum hefur engan árangur borið.

Undanfarin ár hefur opnunartími í miðborginni verið óbreyttur og svo verður einnig í ár. Lokað er á skírdag og föstudaginn langa, opið 10-16 á laugardag, lokað á páskasunnudag og mánudag annan í páskum. Engu að síður verða allmargar verslanir opnar utan þessa leiðbeinandi tíma. Bókabíðir miðborgarinnar eru öllu jöfnu opnar kl. 10-22 og á skírdag og annan í páskum verða margar verslanir opnar frá 12-17, s.s. Kraum, Aurum o.fl. Þess má geta að á sl. ári opnaði verslun 66°í Bankastræti á sjálfan páskadag og erlendir viðskiptavinir fjölmenntu og gerðu umtalsverð kaup á þessum annars rúmhelga degi.

Ljóst er að landkynningarátakið Inspired by Iceland er í góðum höndum og er þegar farið að skila áþreifanlegum árangri í fjölgun ferðamanna á vetrartíma. Einkum eru það helgarferðir sem virðast heilla ferðamenn á þessum árstíma en jafnfrat má greina stóra hópa frá ýmsum heimshornum sem hér virðast dvelja á virkum dögum einnig. Fjölfarnasti ferðamannastaður Íslands er án nokkurs vafa miðborg Reykjavíkur og fer þeim rekstraraðilum fjölgandi sem kjósa að hafa opið um helgar. Fjölbreytileg dagskrá er í boði allan ársins hring í miðborginni. Nægir þar að nefna listasöfnin, Þjóðminjasafnið, Hörpuna, leikhúsin, Norræna húsið og fjölmargt annað, að ekki sé minnst á þá frægu flóru skemmtanalífs og veitingamennsku sem 101 býður upp á , nánast á öllum tímum sólarhrings.

Framundan er Langur laugardagur og er hann helgaður tísku og tónlist enda Reykjavik Fashion festival í fullum gangi. Tónlistarkonan Myrra Rós mun koma fram víðsvegar um miðborgina ásamt teymi sínu og fjölmargar verslanir bjóða upp á sérvöru tengda tískuhátíðinni.

Reykjavik Fashion Festival fer fram 29. mars til 1 apríl.
Hugmyndin að Tískuvökunni byggir á því að auk tískuviðburða í Hörpunni sé efnt til viðburða inni í verslunum sjálfrar miðborgarinnar og tískumiðborgin sjálf yrði opin á fimmtudag frá kl. 18 - 21!
Fyrirmyndin er frá London, París og New York sem hita upp fyrir sínar tískuvikur með Tískuvökum, kvöldið fyrir aðalsýningar sínar.

Nú þegar hafa um 70 verslanir staðfest þátttöku !

Markmiðið er að búa til skemmtilega stemmningu, hvetja fólk til að klæða sig upp, koma í bæinn, kynna sér tísku, vöruúrval, versla og halda uppá tísku og menningu.

Þannig gefst almenningi kostur á að taka þátt í tískuhátíðinni, ekki aðeins útvöldum boðsgestum.

Boðið verðu upp á lifandi tónlist utandyra þannig fólk gangi í góðri stemmingu á milli búða sem verða merktar rauðum blöðrum og kertum.

Tískuvakan hefst sumsé á morgun,fimmtudag 29.mars kl. 18:00 - 21:00

Í Gamla Bió verður síðan boðið í eftirpartí og opið hús frá kl. 21:15
fyrir verslunarfólk og gesti. Freyðandi kokteill og tónlist í boði .

Heimildarmynd RFF 2011 verður svo sýnd í aðalsal frá kl. 9:30.

Nánari upplýsingar veita:

Þórey 659 4440 thorey@rff.is

Margrét Björnsdóttir 822 1489 margretbj@gmail.com

og Jakob Frímann 7 700 700 jfm@midborgin.is

Tískuvikan FASHION NIGHT OUT hefst í miðborginni n.k. fimmtudagskvöld 29.mars kl. 18:00 - 21:00 með lifandi tónlist, DJ, tísku og léttum veitingum á Laugaveginum og víðar. Þá gefst fólki kostur á að fá forsmekkinn af því sem í boði verður á Reykjavik Fashion Festival 2012.

N.k. laugardag, 31.mars verður mikið um að vera í miðborginni. Um kl. 13:00 verður 200 hesta skrautreið um miðborgina frá Skólavörðuholti, niður Skólavörðustíg, Bankastræti og að Hljómskálagarði. Um kvöldið verður Reykjavik Fashion Festival í Hörpunni og víðar og um kvöldið verður Fashion Night Out í anda stórborgannna Lonodn, París og New York þar sem nýjustu stefnur og straumar verða til sýnis undir hrunfastri tónlist.

Mikið verður um vera í miðborginni og víðar er hinn árlegi Hönnunarmars gengur í garð. Hvergi eru fleiri verslanir og vinnustofur helgaðar hönnun en einmitt í miðborginni. Nánari upplýsingar má finna á vefnum : honnunarmars.is og upplýsingar á ensku eru á vefslóðinni http://issuu.com/designmarch/docs/designmarch2012
Sífellt bætíst í hóp þeirra verslana sem hyggjast hafa opið til kl. 17 eða lengur laugardaginn 24.mars. Helgina þar á eftir verður síðan hátíðin Reykjavik Fashion Festival haldin í miðborginni og fara flestar tískusýningar þeirrar hátíðar fram í Hörpunni.

Arkitektafélag Íslands langar að bjóða gesti HönnunarMars, fjölskyldur og börn, sérstaklega velkomin í Ráðhús Reykjavíkur til þess að byggja módel í borg, sem mun vaxa í sölum Ráðhússins. Þessi líflegi og skemmtilegi viðburður ber heitið Fyrirmyndarborg.
Búið er að skipuleggja gólf Ráðhússins á þann veg að fjölskyldur og aðrir þátttakendur geta fengið úthlutað lóð og geta á lóðinni byggt hús, garða eða torg. Þátttakendur geta komið hvenær sem er á opnunartíma og fengið lóð og ráða sjálfir hversu löngum tíma þeir eyða í að byggja á sinni lóð. Þannig mun borg rísa á gólfi ráðhússins á meðan á HönnunarMars stendur. Þeir sem ekki geta tekið þátt geta fylgst með af svölum Ráðhússins. Að vinnusmiðjunni lokinni verður hægt að rölta um götur borgarinnar og virða hana fyrir sér.
Öll föndurgögn og efniviður í borgina verða á staðnum. Viðburðurinn verður eins samfélagslega ábyrgur og vistvænn og hugsast getur. Efniviðurinn, sem fjölskyldur og börn vinna með, mun allt vera endurnýtt efni, skókassar, gömul tímarit, afskurðir úr prentstofum og annað slíkt. Föndurgögn, svo sem skæri, tússlitir og annað slíkt, fara til hjálparstarfs að viðburðinum loknum.
Ekki er ætlast til að börn séu skilin ein eftir í vinnusmiðjunni heldur er von okkar sú að foreldrar eða forráðamenn verði sérlegir aðstoðarmenn barnanna við hönnun, byggingu og frágang.
Á opnun sýningar Arkitektafélagsins munu félagsmenn taka þátt í skemmtilegri áskorun þar sem þeim verður úthlutað nokkrum lóðum í skipulaginu og þeir ýta viðburðinum úr vör. Lóðir arkitekta og lóðir barnanna munu þannig standa hlið við hlið.
Með Fyrirmyndarborg – Model City vinnusmiðjunni er ætlunin að kynna skapandi hlið arkitektúrs fyrir gestum HönnunarMars.
Endilega lítið við og sýnið okkur arkitektum hvernig ykkar fyrirmyndarborg lítur út!